TÍTULO I

DISPOSICIÓN XERAL

Artigo 1º

O presente regulamento, nacido da potestade regulamentaria e de auto-organización expresamente recoñecida a esta entidade polo artigo 4 da Lei de bases de réxime local, ten por obxecto:

·         Precisar os símbolos da cidade de Narón;

·         A concreta regulación da celebración dos actos públicos municipais; e

·         A específica determinación das distincións honoríficas que concede esta Corporación municipal, así como o procedemento para a súa concesión.

TÍTULO II.- DO PROTOCOLO

CAPÍTULO PRIMEIRO.- HERÁLDICA E VEXILOLOXÍA

Artigo 2 º      

O escudo do Concello de Narón consta dos seguintes compoñentes heráldicos:

“Escudo medio partido e cortado. 1º de ouro cinco trabas de azur. 2º. De azur, dúas chaves de ouro adosadas e entretidas cos seus aneis en forma de rombo pometeados. 3º. De azur, dúas espigas de ouro e sobre elas unha áncora de prata. Ó timbre, coroa real pechada.”

Artigo 3º

1.-A bandeira do Concello de Narón estará formada por:

“Sobre pano de cor B+ (azul escuro), posta en pau, paralelas á vaina, en proporción 2/3, lado menor da bandeira, dúas chaves de cor ouro, abaciais de Cluny, espilidas, adosadas e entretidas cos aneis en forma de rombo e pometeados, cara ao canto inferior á asta, en punta”.

2.- Sobre da bandeira do municipio, non se poderán utilizar símbolos ou siglas de partidos políticos, sindicatos, asociacións ou calquera entidade privada.

Artigo 4º

1.-A bandeira do municipio ondeará no exterior da Casa Consistorial de Narón xunto coa bandeira de España, a de Galicia e a da Unión Europea. Situarase ao lado esquerdo da bandeira nacional, e estará así mesmo situada nun lugar destacado no Salón de Plenos e no despacho do/da titular da Alcaldía, xunto coas citadas bandeiras.

Artigo 5º

Os reposteiros municipais, nos que figurarán o emblema de España, Galicia e do Concello de Narón (vid. artigo 2º) exhibiranse na Casa Consistorial en lugar destacado e de maneira permanente.

CAPÍTULO SEGUNDO

DOS MEMBROS DA CORPORACIÓN

Artigo 6º

De conformidade coa lexislación vixente, o/a alcalde/sa, xunto cos demais membros da Corporación, terán o tratamento de señoría.

Artigo 7º

Os atributos de representación do cargo de alcalde/sa son os seguintes:

• Bastón de mando con empuñadura de ouro co escudo do concello e borlas.
• Medalla co escudo de Narón.

Artigo 8º

 Os atributos representativos  do cargo de concelleiro/a son os seguintes:

• Medalla co escudo de Narón.

Artigo 9º

O/a alcalde/sa utilizará a medalla e o bastón de mando o día da súa toma de posesión e naqueles actos que pola súa solemnidade así o requiran ou demanden, ao seu xuízo.

Artigo 10º

Os/as tenentes de alcalde/sa, cando exerzan a representación da Alcaldía nos actos sinalados no artigo anterior, poderán utilizar o bastón de mando e a medalla do Concello.  De non exercer tal representación só utilizarán a medalla.

Artigo 11º

Os concelleiros utilizarán a medalla do Concello nos actos sinalados no artigo 9º e naqueles outros cuxa natureza requira asistir a eles con traxe de etiqueta.

Artigo 12º

O bastón de mando é propiedade do Concello e permanecerá resgardado en lugar seguro en tanto non sexa utilizado para os fins anteriores. A medalla de Narón pasará a ser propiedade do/da concelleiro/a desde o mesmo momento da súa efectiva toma de posesión ante o Pleno municipal. No suposto de cesamento e ulterior obtención da condición de membro da  Corporación, deberá nese momento achegar a medalla que lle foi outorgada con anterioridade.

CAPÍTULO  TERCEIRO

DOS ACTOS PÚBLICOS MUNICIPAIS

Artigo 13º

Para os efectos do presente regulamento, os actos oficiais municipais clasifícanse en:

-           Actos de carácter xeral, que son aqueles que  organiza  a Corporación municipal con ocasión de conmemoracións ou acontecementos destacados ou importantes de carácter local.

-           Actos de carácter especial, que son aqueles organizados polas diferentes áreas de actuación municipal con ocasión de conmemoracións ou acontecementos propios do ámbito específico dos seus respectivos servizos, funcións e actividades.

Artigo 14º

Os membros da Corporación teñen o dereito e a obriga de asistir a todos os actos oficiais solemnes organizados pola entidade local. No suposto de imposibilidade de asistencia están obrigados a escusar formalmente a súa ausencia ante o departamento organizador do evento.

O/a presidente/a da Corporación cursará as invitacións para tales actos, agás cando no acto participe outra entidade ou administración pública, en cuxo caso realizaranse de maneira conxunta.

O funcionario xefe de Protocolo do Concello, de conformidade coas instrucións que reciba da Alcaldía ou do/da titular da área de dependencia, confeccionará e remitirá a todos os membros da Corporación e coa antelación necesaria, as directrices e normas específicas que rexerán para cada acto público en concreto, sempre e cando a súa importancia o aconselle ou obxectivamente o requira.

Artigo 15º

Como norma e regra xeral, os membros da Corporación asistirán aos actos solemnes:

• No caso dos concelleiros, con traxe escuro e medalla de Narón.
• No caso das concelleiras, vestido curto, con saia ou pantalón e medalla de Narón.

Artigo 16º

De conformidade co establecido na lexislación vixente, corresponde ao/á alcalde/sa presidir todos os actos que se celebren no termo municipal de Narón. No suposto de atoparse imposibilitado/a para exercer a devandita presidencia, exercerá tal función a autoridade municipal de carácter electivo por el/ela mesmo/a designada.

No suposto de asistencia a un acto público municipal, de autoridades da administración do Estado ou da Comunidade Autónoma, estarase ao disposto no Real decreto 2099/1983 de 4 de agosto –capítulo II, artigos 4º e 5º- polo que se aproba o Ordenamento xeral de precedencias no Estado.

Artigo 17º

Nos actos propios de carácter especial, organizados por unha área municipal e que non sexan presididos pola Alcaldía, exercerá a presidencia, por delegación desta, o/a responsable da devandita área. Se a presidencia a exerce a Alcaldía, o/a responsable da área acompañará á primeira autoridade municipal no lugar de localización da presidencia.

Artigo 18º

Os concelleiros e as concelleiras que asistan aos actos públicos e non ocupen lugar na presidencia, situaranse en todo caso nun lugar preferente.

Artigo 19º

A presidencia dos actos corporativos municipais, nos supostos de vacante, ausencia ou enfermidade do/a titular da Alcaldía, corresponderá á persoa que exerza a Alcaldía accidental conforme á súa tenencia de Alcaldía.

Artigo 20º

A orde de prelación interna da Corporación municipal e de altos cargos será a seguinte:

Ø  Alcalde ou alcaldesa.

Ø  Tenentes de alcalde/sa pola súa orde de nomeamento.

Ø  Concelleiros e concelleiras da Xunta de Goberno, pola orde do seu nomeamento, por idade ou por orde alfabética.

Ø  Voceiros dos grupos políticos municipais (no suposto de integración no Grupo Mixto de membros de partidos políticos, asociacións, agrupacións ou coalicións, diferentes, reputaranse por tales a totalidade dos seus integrantes) en función do número de votos obtidos nas eleccións municipais.

Ø  Concelleiros ou concelleiras con delegacións xenéricas da Alcaldía, pola orde na que consten na respectiva lista electoral.

Ø  Concelleiros  ou concelleiras dos grupos políticos, pola súa orde na lista electoral respectiva, e en función da maior ou menor representación municipal obtida.

Ø  Funcionarios e funcionarias con habilitación de carácter nacional, encabezados polo secretario ou secretaria xeral do Concello.

Ø  Directores/as e xerentes de padroados e empresas municipais, exclusivamente en actos vinculados a tales entidades.

Artigo 21º

Con carácter meramente orientativo, a orde de precedencia das diferentes áreas municipais será a seguinte, sen prexuízo da concreta organización dos servizos acordada en cada lexislatura:

            I.        Cultura

          II.        Deportes

        III.        Ensino

         IV.        Facenda

           V.        Mocidade

         VI.        Obras

      VII.        Participación Cidadá

    VIII.        Persoal

         IX.        Promoción Industrial

           X.        Sanidade e Medio Ambiente

         XI.        Seguridade Cidadá

      XII.        Servizos Sociais

    XIII.        Servizos

     XIV.        Urbanismo

CAPÍTULO IV

ACTOS PÚBLICOS MUNICIPAIS SINGULARES

Artigo 22º

A toma de posesión dos membros da Corporación municipal e a da súa presidencia revestirá a maior solemnidade posible. Así mesmo, cando se substitúa algún membro da Corporación durante o mandato corporativo, procurarase que a nova toma de posesión revista igualmente a maior dignidade coa cerimonia de xuramento ou promesa.

Artigo 23º

A Corporación municipal, a instancias da Alcaldía e coñecemento da Xunta de Portavoces, organizará os actos públicos propios que considere oportunos co fin de complementar aqueles actos ou eventos organizados para solemnizar o día da Festa Nacional de España, o da Constitución e o da Comunidade Autónoma. Así mesmo, poderá celebrarse o día da festividade dos barrios e parroquias da localidade e da Policía Local; así como participar corporativamente en inauguracións, feiras e festas locais.

Artigo

24º

Para constancia das visitas ilustres, a xefatura de protocolo do Concello abrirá, levará e custodiará un libro de honra no que se recollerán as devanditas visitas, invitándoas a plasmar a súa sinatura e un breve texto de agradecemento naquel documento.

Artigo 25º

As propostas de irmandade con outra cidade ou localidade, así como a súa expresa aceptación, se é o caso, requirirán a adopción de acordo plenario adoptado por maioría simple dos seus membros, tras un expediente previo incoado pola Alcaldía, no que se farán constar as razóns que o motivan e a súa conveniencia e oportunidade.

Unha vez aprobada a proposta polo Pleno do Consistorio, sinalarase o lugar e a data para proceder á formal sinatura da irmandade e procurarase a celebración de dúas cerimonias consecutivas nas dúas sedes corporativas dos entes respectivos.

Para tales efectos teranse en conta as regulamentacións existentes de ámbito supramunicipal.

Artigo 26º

En todo caso a organización de actos públicos oficiais rexerase polas normas contidas nas disposicións do Estado sobre a materia que lle sexan de aplicación en cada momento, e as que, sobre a mesma cuestión, dite a Comunidade Autónoma de Galicia. Complementarase, en todo caso, coas previsións incluídas no presente regulamento, así como con todas aquelas que por tradición sexan coñecidas e comunmente aceptadas.